All Filipinos are STUPID!!! - 6/'07

kagagaling ko lang ng survey sa shaybah sa eastern region. ”city of the golden sand” daw yun ayon sa nabasa kong billboard dun sa airport nila. aramco teritory yun at sila lang ang may private airport dun. kaya lumipad muna ako mula riyadh papuntang dammam at sa aramco terminal kami nagkitakita ng mga ibang members ng survey team. mula dammam sumakay kami ng aramco private plane papuntang shaybah. pero hindi yun ang kwento ko.

nung nasa riyadh airport pa lang ako at naghihintay ng flight papuntang dammam, isang matandang lokal ang lumapit sa akin. puti na ang kanyang buhok pati ang balbas niya, may bitbit siyang attache case. di ko marinig ang sinasabi niya kaya dali-dali kong tinanggal ang earphones ng mp3 player ko. sayang, malapit na sana sa chorus ang kanta ng aegis na pinagtritripan ko. gigiling na sana ako kaso hindi natuloy. tulo-laway na naman sana ang mga bading na nakaupo sa gate 38 at iipitan ako ng tig 1 riyal sa garter ng brief ko. pero hindi pa rin yan ang kwento ko.

lumapit siya sa akin, akala ko mag-aalok ng binebentang encyclopedia... “can you read the gate number please. i cant see, i’m just guessing...” inabot niya sa akin ang kanyang boarding pass. sinabi ko na tama siya, gate 38 nga ang nakalagay sabay tanong, “if u dont mind me asking, how old are you sir?”. medyo simpleng english lang muna ang binitawan ko. simple subject at simple predicate lng. baka kasi magulo ang utak ni tatang. “i forgot.”, sabi niya. aba... marunong ‘to sa isip-isip ko. kaya itinaas ko na yung level ng spoken english ko. ”where do you work?”, tanong niya. sinabi ko nga yung work ko dito sa riyadh. ”are you from dammam sir? how’s the weather there these past few days? did it rain?”. ayun, compound sentences na ang mga binabato ko. di naman daw rainy season at di rin dumaan ang first-ever saudi storm sa dammam. tapos sinabi niya na di naman daw gaya ng weather sa pinas na maulan lagi. nagulat ako kasi alam niya. bakit??? “are you filipino?” tinanong niya ako. nagduda siguro sa mala-F4 at korean features ko. parang gusto kong kumanta at sumayaw sa harap niya tuloy ng “bebot...bebot....be-bebot bebot be... filipino! filipino! filipino!” kaso OA na yun. kinuwento niya na pumupunta daw sa sa pinas to recruit labor para sa construction at sa power plants. kaya tinanong ko kung ano ang masasabi niya sa mga filipino worker. “not so bad” naman daw.

ang sumunod na mga katagang binitawan niya ang sapul na tumama sa akin hanggang sa ngayon. “all filipinos are stupid.” di ko talaga inexpect na sabihin niya iyun. akala ko pa ay pupurihin niya ang kakayahan nating mga pinoy, pero kabaliktaran ang nangyari. natulala ako at natameme. ”why do you say so, sir?” tanong ko. sabi niya, ”look, you are all healthy, hard-working, well-educated but you don’t think as a country, as filipinos.” mabuti pa daw ang thailand at ang korea. “see the presidents you elected from marcos til now.” pati si imelda kilala niya. grabe! gusto ko sanang aminin na lang na ako si jerry yan ng F4 pero huli na. masakit sa akin pakinggan habang nilalait niya ang mahal kong pilipinas, pero oo tama nga siya. bobo tayong mga pinoy. tanga tayo pagdating sa pagpili ng mga namumuno sa ating bansa. kelan kaya tayo matututo? di ako nakasagot... biglang umalis si tatang pero in-shock pa rin ako. wake up call yun para sa akin... nakinig na lang ako sa mga kanta ng yano pag-alis niya. “kumusta na? ayos pa ba? ang buhay natin, kaya pa ba? eh kung hindi, paano na? ewan mo ba. bahala na.”

tama si tatang... ang tatanga nga nating mga pinoy. ewan ko, hinahanap ko rin ang kasagutan kung bakit di tayo nagkakaisa. kung bakit hindi na tayo umaangat kahit sa asia man lang. sa ngayon, nauuna na ang vietnam at thailand sa atin. hanggang ngayon, mga basura pa rin ang nilalagay natin sa pwesto. kakatapos lang ng eleksyon. ganun pa rin ang siste. palakasan pa rin yan ng utot sa session hall ng kongreso at senado. akala ko nga intelligent voters na tayo pero hindi pa rin pala. bakit nga ba tayo nagkaganito?siguro dala na rin sa geography natin. pano mo nga ba mapag-isa ang 7,100 ka isla kahit low tide? magaling lang tayo sa regionalismo. kahit dito sa saudi watak-watak, kanya-kanya at inggitan. kesyo mayayabang ang mga kapampangan at mga illongo, mga baduy ang mga bisaya, kuripot ang ilokano at kung ano-ano pa. nakakabanas na rin minsan.

pinilit ko na lang na kalimutan ang mga sinabi ni tatang at sumakay na lang ng eroplano. nakapila na ako sa aisle ng bigla kong nakita uli si tatang. tinawag niya ako, inabot ang kanyang boarding pass at sabay tanong, ”what’s my seat number?”. pinigilan ko na lang ang aking sarili. gusto ko sanang sumagot ng... ”42B, tanga!”.